வகைகள்

1. பசுமை வகை (துளசி) மற்றும்
2. ஊதாவகை (கிருஷ்ண துளசி)

மண் மற்றும் தட்பவெப்பநிலை

இவை எல்லா வகை மண்களிலும் வளரும். அதிக உப்பு, காரத்தன்மை மற்றும் நீர் தேங்கும் பகுதிகளில் வளருவதில்லை. அங்ககத் தன்மையுள்ள மணல் கலந்த பசளை மண்ணில் நன்கு வளரும். வெப்பம் மற்றும் மிதவெப்ப காலநிலையில் நன்கு வளரும். உயர் வெப்ப நிலை மற்றும் நீண்ட நேரம் பகலாக உள்ள காலநிலையில் தாவர வளர்ச்சி மற்றும் எண்ணெய் உற்பத்தி சாதகமானதாக இருக்கும் என்று கண்டறியப்பட்டுள்ளது.

இனப்பெருக்கம்

துளசி விதைகள் மூலம் இனப்பெருக்கம் செய்யப்படுகிறது. விதைகள் மூலம் இனப்பெருக்கம் செய்ய, விதைகள் நாற்றங்கால் படுக்கையில் விதைக்கப்படுகின்றன. ஒரு எக்டர் நிலத்திற்கு 300 கி விதைகள் தேவைப்படும். நாற்றங்கால் அரை நிழல் மற்றும் பாசன வசதியுடன் இருக்க வேண்டும். மண்ணை 30 செ.மீ அளவிற்கு பறிக்க வேண்டும். நன்கு மக்கிய தொழுவுரங்களை மண்ணில் அளித்து மண்ணை பண்படுத்த வேண்டும். 4.5x1.0x0.2 மீ அளவுகொண்ட படுக்கைகளை அமைக்க வேண்டும். பருவமழை தொடங்குவதற்கு 2 மாதங்கள் முன்னரே, 1:4 என்ற விகிதத்தில் விதைகளை மணலுடன் கலந்து நாற்றங்கால் படுக்கைகளில் விதைக்க வேண்டும். 8 முதல் 12 நாட்களில் முளை வந்துவிடும் மற்றும் நாற்றுகள் 6 வாரங்களில் 4-5 இலைகளுடன் நடவிற்கு தயாராகிவிடும்.

விதையில்லாப் பெருக்கம்

துளிசியின் நுனிகளை வெட்டி அக்டோபர் – டிசம்பர் மாதங்களில் நடவு செய்தால் 90-100 சதவிகிதம் முளைத்துவிடும். இதற்கு 8-10 கணுக்கள் மற்றும் 10-15 செ.மீ நீளமுடைய துண்டுகள் உபயோகிக்கப்படுகின்றன. முதல் இரண்டு, மூன்று ஜோடி இலைகளைத் தவிர மற்றவை அகற்றப்படுகின்றன. பிறகு அவை நன்கு தயாரிக்கப்பட்ட நாற்றங்கால் படுக்கைகள் அல்லது பாலித்தீன் பைகளில் நடவு செய்யப்படுகின்றன. 4 – 6 வாரங்களில் வேர்கள் பிடித்துவிடும். அவை விளைநிலங்களில் நடவு செய்ய தயாராகின்றன. வரிசைகளுக்கு இடையே 40 செ.மீ இடைவெளியில் விட வேண்டும்.

உர மேலாண்மை

விளை நிலம் தயார் செய்யும்போது எக்டருக்கு 15டன் தொழுவுரத்தை அடியுரமாக அளிக்க வேண்டும். தழைச்சத்து, மணிச்சத்து மற்றும் சாம்பல் சத்து முறையே எக்டருக்கு 120:60:60கிகி பரிந்துரைக்கப்படுகிறது.

பாசன மேலாண்மை

தாவரங்கள் நன்கு வளர ஒரு மாதத்திற்கு வாரம் இருமுறை பாசனம் செய்ய வேண்டும். பிறகு, மழையின் அளவு மற்றும் மண்ணின் ஈரப்பதத்தை பொறுத்து வார இடைவெளியில் பாசனம் செய்ய வேண்டும்.

களை மேலாண்மை

களையில்லாமல் இருக்க போதுமான இடைவெளியை கடைபிடிக்க வேண்டும். முதல் களையெடுத்தல் நடவு செய்த ஒரு மாதம் கழித்து எடுக்க வேண்டும். அடுத்த 30 நாட்களில் இரண்டாவது முறையாக களையெடுக்க வேண்டும். பிறகு களையெடுத்தல் அவசியமில்லை. செடி வளர்ந்து புதர் போல் மண்ணை மூடி விடும். ஒவ்வொரு அறுவடைக்குப் பின்னரும் களையெடுத்தல் அவசியமாகும்.

பயிர் பாதுகாப்பு

துளசி அதிகளவில் பூச்சி மற்றும் நோய்களால் தாக்கப்படுவதில்லை. சில பூச்சிகள், இலைச் சுருட்டுப் புழு போன்றவை துளசியை தாக்குகின்றன. 0.2 சதவிகிதம் மாலத்தியான் அல்லது 0.1 சதவிகிதம் மெத்தில் பாரத்தியான் தெளிப்பதன் மூலம் கட்டுப்படுத்தலாம்.

துளசி போன்ற மருத்துவ தாவரங்களுக்கு ரசாயன பூச்சிக்கொல்லிகள் அவசியமில்லை. அங்கக தன்மைகொண்ட வேம்பு சார்ந்தவற்றை பயன்படுத்துவது போதுமானது. சாறு உறிஞ்சும் பூச்சிகளை கட்டுப்படுத்த மீன் எண்ணெய் சோப்புகளை பயன்படுத்தி கட்டுப்படுத்தலாம்.

சாம்பல் நோயைக் கட்டுப்படுத்த நனையும் கந்தகம் 0.3 சதவிகிதம் தெளிக்கவும். நாற்று கருகல் மற்றும் வேர் அழுகல் நோயைக் கட்டுப்படுத்த நாற்றங்கால் படுக்கைகளில் 0.1 சதவிகிதம் மெர்குரியல் பங்கிசைடு மண்ணில் அளிக்க வேண்டும்.

அறுவடை மற்றும் மகசூல்

முதல் அறுவடை நடவு செய்த 90 நாட்களுக்குப் பிறகு செய்ய வேண்டும். பிறகு ஒவ்வொரு 75 நாட்களுக்குப் பிறகும் அறுவடை செய்யலாம். பயிர் நன்கு வளர்ந்த பிறகு 15 செ.மீ அளவிற்கு வெட்டி அறுவடை செய்ய வேண்டும். அப்போதுதான் பயிர் அடுத்த அறுவடைக்கு தயாராகும். வெயில் காலங்களில் அறுவடை செய்வதால் அதிக அறுவடை செய்யலாம் மற்றும் எண்ணெய் அளவும் அதிகமாக இருக்கும்.

ஒரு வருடத்திற்கு ஒரு எக்டருக்கு துளசி மூலிகைகள் தோராயமாக 10,000 கிகி கிடைக்கும். இந்த மூலிகை 0.1 முதல் 0.23 சதவிகிதம் எண்ணெய் கொண்டது மற்றும் எக்டருக்கு 10-20 கிகி எண்ணெய் கிடைக்கிறது. பாசனம் செய்யப்பட்ட துளசியில் அதிக அளவு மகசூல் கிடைக்கும். (20 டன் வரை மற்றும் எண்ணெய் மகசூல் எக்டருக்கு 40கிகி வரை).